شونلاين ايجيبت ابواب وشبابيك UPVC
رياضةنادي حدائق الأهرام

نص كلمة المهندس محمد نافع رئيس نادي حدائق الأهرام خلال ندوة هنكمل التطوير.. (فيديو)

كتب: محمد عصام 

عقدت قائمة هنكمل التطوير ندوتها الأولى، برئاسة المهندس محمد إبراهيم نافع الرئيس الحالي لمجلس إدارة نادي حدائق الأهرام، والمرشح على نفس المنصب في الانتخابات المقبلة.

حيث اقيمت ندوة هنكمل التطوير، بحضور الاعضاء المرشحين لانتخابات مجلس إدارة نادي حدائق الأهرام ضمن قائمة المهندس نافع.

وايضا بحضور عدد من نجوم الكورة، والإعلام والصحافة، ونواب البرلمان، وذلك مساء يوم السبت الماضي، وأقيمت بمنطقة «طيبة» احدث انجازات المجلس الحالي، والمقرر افتتاحها رسمياً يوم السبت المقبل الموافق الـ20 من نوفمبر الجاري.

وجاءت كلمة المهندس محمد نافع خلال الندوة الأولى لقائمة هنكمل التطوير كالتالي:

بسم الله الرحمن الرحيم

النهاردة عيد بالنسبة لنا، عيد إن إحنا نشوف اخواتنا وحبايبنا، والقامات اللي اتعلمنا على ايديهم موجودين معنا.

اسمحوا لي قبل ما ابتدي واقدم قايمتي، عايز اشكر واسمحولي ان انا هبعد شوية عن الانتخابات، معلش عشان كلمة استاذي واستاذتي، الدكتور حمدي السيسي، والدكتورة مايسة عطوة استاذتي، انت كنت بتجيب الفلوس منين؟ اسمحولي بأسمكم أشكر ربنا أقسم بالله ربنا وحده اللي يتشكر، الفلوس جت منين، من عند ربنا مش من عند حد، ربنا هو اللي وفقنا إن النادي بتاع حضراتكم بتاعنا كلنا إن يبقى بالشكل ده.

«النادي اللي استلمناه من أربع سنين اجمل مافيه هو حضراتكم»، لكن مكناش بنعرف نشرب كوباية شاي قبل الساعة خمسة.

الناس الموجودة تعرف أنا عضويتي «266»، يعني عضو مؤسس، ومش معنى كده اني بذم في حد قبل مني، لاء كتر خير أي حد قبل مني أو قبل مجلسنا زرع شجرة، عمل أي حاجة في النادي، ولكن الناس عارفة، عارفة التاريخ، مكنش عندنا ملاعب، مكنش عندنا جلسات نقعد نفتخر بيها، مكنش عندنا نادي نقول لأصحابنا إحنا أعضاء في نادي حدائق الأهرام.

انا اسف اسف اسف اني اقولها في بعضنا كان بيتكسف لما يقابل حد عضو في نادي الصيد أو حد عضو في الأهلي ولا في الجزيرة ولا في الزمالك، أن يقوله انا عضو في نادي حدائق الاهرام، انا اسف ان انا اقول كده، ولكن النهاردة لاء بقولها انا عضو في نادي حدائق الأهرام ويشرفني أن انا عضو في نادي حدائق الأهرام، كل ده والله بتوفيق ربنا فقط فبأسمكم انا بشكر المولى عز وجل، أن وفقنا في الاربع سنين اللي فاتوا.

ومعلش اسمحولي هخرج برضه بره الصندوق، معلش انا اسف هشكر روح «ابويا وامي»، الله يرحمهم، اللي ربوني على أن الإخلاص هو سر النجاح والله العظيم الإخلاص هو سر النجاح، وأقسم بالله العظيم الإخلاص هو سر النجاح، واللي اتعمل في النادي ما كان حاجة تاني غير اخلاص.

ابويا الله يرحمه ويحسن اليه، قالهالي وقولتهالكو كتير، «لو أخلصت النية لو رميتها عوجة هتتعدل».

اللي عملناه مش عشان احنا احسن ناس، والله لاء، اللي عمله مجلس الإدارة عشان احنا اخلصنا النية، احتسبنا أربع سنين من عمرنا لله ونتمنى من المولى عز وجل إن يكون ده في ميزان حسناتنا يوم القيامة.

أي نجاح كان بيتم كان من ربنا مش من حد تاني، يمكن وانا واقف مع حضراتكم دلوقتي، شريط بيمر ادامي أربع سنين، أربع سنين شقينا فيها، شقينا فيها بجد،على حساب بيتنا وحياتنا.

ويمكن بأستسمحكم بعد إذنكم برضه، «بشكر اخواتي» كتر الف خيرهم، اللي شالو عني الشغل الفترة اللي فاتت.

«بشكر زوجتي»، المحترمة اللي شالت عني بيتي ، أنا كنت تقريبا مقيم في قلب النادي سايب شغلي لـ اخواتي، وسايب بيتي لـ مراتي.

والحمد لله ربنا كرمني سواء شغلي زاد، وفي بيتي الحمد لله، «بنتي الكبيرة» حضراتكم كرمتوها، بإمتياز مرتبة شرف كلية إعلام واتعينت معيدة، ده إخلاص نية.

أنا أسف أن انا أبتدي البداية دي، ولكن دي كلمة حق كان لازم تتقال.

عايز اشكر «مجلس الإدارة المحترم» اللي اشتغلت معه وشرفت إني كنت واحد منهم، بشكر مجلس إدارة في ناس محترمة مكملتش بعد كده وقالت لاء إحنا الأربع سنين كفاية، مش قادرين لأن انا أجهدتهم في الأربع سنين بجد تعبتهم.

جرينا الجارية دي ليه؟ معلش هرجع تاني، من أربع سنين، اتقال واشاعات طلعت، هو «محمد نافع»، اللي عنده «السي ڤي» ده، اللي عنده «١٢ شركة»، فاضي هيجالكم هتشفوه، ده كل شهر مرة، حضراتكم رديتوا على الكلام ده من أربع سنين وجت نتيجة الانتخابات باكتساح، قائمة محمد نافع اكتساح، العشرة كلهم اكتساح.

مكنش ينفع اللي حضراتكم عملتوه عشنا يكون رد الجميل إن إحنا منعملش حاجة، احرجتونا وكسفتونا وخلتونا نشتغل، وتشتغل اكتر مما كنا نتخيل.

انا بتكلم من قلبي معلش اللي بيجي على بالي بقوله لأن والله العظيم انا مش متخيل أن حضراتكم جايين النهاردة عشان تسمعونا ربنا يبارك فيكم.

بشكر أربعة محترمين خرجوا من مجلس الإدارة دلوقتي، ومقدموش في المجالس اللي جاية فبأسم حضراتكم بشكرهم،

_ مدام نجلاء إسماعيل، كتر الف خيرك يا مدام نجلاء.

_ الأستاذ خالد عويس، بشكره الاخ العزيز المحترم.

_ الأستاذ أحمد إمام، الراجل المحترم الخلوق بشكره.

_ الأستاذ الخلوق المحترم أيمن جمال، كان لازم اشكره.

طبعا كان لازم اقول الكلام ده قبل ما أقدم القائمة اللي انا بشرف إن أنا اكون واحد منهم.

إحنا معنا خمسة من المجلس القديم، وخمسة شباب جداد، من المجلس القديم:

_ الحكيم بتاعنا، بس مش حكيم بيدي حقن الاستاذ «مجدي كمال»، نائب رئيس النادي السابق إن شاء الله اللي جاي بإذن رب العالمين، الاخ الكبير اللي بتشرف بوجودي معه.

_ امين الصندوق، وانا بعد اذن المهندس «عدلي القيعي»، انا سميته هاني القيعي لأنه عمل صفقات وديت السباحة في حتة تانية، الاستاذ «هاني فراج»، امين الصندوق السابق وان شاء الله هيبقى اللي جاي بإذن رب العالمين .

_ الاخ العزيز المحترم اللي بالأمانة ينفع رئيس نادي والله ينفع كل حاجة، اتعلمت منه كتير اوي بجد، ومش معنى أنه موجود كعضو مجلس إدارة لاء المكان اصغر منه بكتير، اخويا الأستاذ «طارق زين»، المحترم.

_ الاخ العزيز الجميل، بتاع الكورة الاهلاوي اللي بيطلع عيني، الاستاذ «حسن نور».

_ كابتن مصر وكابتن العالم العسكري في الملاكمة، الكابتن «محمد ذكي»، ابو قلب طيب الجميل.

_ البوب «إيهاب رجب» رجل الجميل المحترم، الخدوم.

دول كلهم فوق السن.

_ ومعنا بنتنا واختنا الصغيرة، هي ام زي كل الامهات بس ام صغيرة شوية، الأستاذة «دينا هاني».

_ واسمحلي ان انا اقدم واحد قديم معنا بس لسه برضه معنا وربنا يبارك فيه، ابننا العزيز الاستاذ «احمد جمال»، عضوية تحت السن.

_ وابننا الغالي ٢٦ سنة ماشاء الله ولا قوة الا بالله وماجستير في القانون بامتياز، «علي أحمد علي».

اقرأ موضوعات ذات صلة:

نادي حدائق الأهرام ينتظر استكمال مسيرة التطوير بقيادة المهندس محمد نافع وقائمته

بالصور– منطقة «التمر حنة» بنادي حدائق الأهرام قبل وبعد تولي المجلس الحالي

«نافع» رئيس نادي حدائق الأهرام.. يكشف عن القائمة التي سوف يخوض بها الانتخابات القادمة

لأول مرة.. أبطال نادي حدائق الأهرام يحصدون الميداليات الذهبية والفضية والبرونزية ضمن منتخب مصر في البطولة الإفريقية للسباحة

بطلات نادي حدائق الأهرام من ذوي الهمم يحصدن بطولة الجمهورية لألعاب القوى

بحضور رئيس مجلس الإدارة.. لاعبو نادي حدائق الأهرام يجتازون اختبارات الأحزمة بنجاح

بالصور لقاء مجلس ادارة نادى حدائق الأهرام بالأعضاء لتوضيح موقف النادي من قانون القيمة المضافة

رئيس نادى حدائق الأهرام يجتمع بأعضاء النادى لمناقشة القيمة المضافة

نادى حدائق الأهرام يفوز على صول برباعية

موضوعات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى